(شرفتى يا عدرا)

قصيده

(شرفتى يا عدرا)

للشاعر رمزى بشاره

شرفتى عدرا

قال إيه بيقولوا مفيش لا تَجَلِّى وَلاظهورات
وإن القسيس حَب يجمَّع حَبِّة جِنيهات!!
قام قال هُبَّة ... بُصُّوا يا ناس العَدرا آهيَّة فُوق القُبَّة
بَعد ما جاب واحد بالليزر يِعمل حَرَكات!!
طَب آهية مش سايبَة مكان إلاَّ وِبتِظهَر فِيه
المُسلِم جانب أخوه القِبطى شاف زَيِّه
ليه الإنكار ... رُوحوا وشُوفوا بنَفسُكوا قبَّل أمَّا تاخدوا قَرار
دى مش خُرافات هاتوا دليلكُم عاالإتِّهامات
قال إيه بيقولوا دى إشاعَة وبلاش مِنها
دى واحدة وماتِت إدعوا لها الله يِرحَمها
نِسيوا المكتوب ... إله إبراهيم وإله إسحَق وإلَه يعقُوب
والرَّب إلهنا إله أحياء. ومش أموات
العَدرا وكُل القِدِّيسين فى السَّما عايشين
أرواح نورانِيَّة قُدَّام عَرش الله ساجدِين
آه هُمَّ صَحيح ... وَيَّا المَلايكة مَشغولين قَوى بالتَّسبيح
بَس يسُوع بيبَلَّغهم مين طالِب صَلوات
طَبعاً داخلين السَّما بِيسُوع وِبفَضل الدَّم
القِدِّيسين دول مابيِمحُوش خَطايانا يا عَم
بَس المَوضُوع ... إن صلاتهُم عَنا مَقبُولَة عَند يسُوع
ده البار طِلبِتُه قادرَة وِبتِعمِل مُعجِزات
العَدرا آهية باينَة وظاهرَة قُدَّام النَّاس
فى مكان وإتنين وِفـ عَشَرَة مِش فى مَكان وِخلاص
وحَمام مِن نُور ... فُوق الكنيسة وعا القُبَّة عَمَّال بيدُور
العَدرا جايَّة وجايبَة بَرَكَة وتَعزِيَّات
ياما ناس لَمَّا تشُوفِك هَتمَجِّد إسم الله
هَيقَرَّبُوا لِكنِيستُه وِهَيِرجَع ياما خُطاه
وِفى ناس تانيين ... مش فارقَة معاهُم وقلوبهُم قاسية وجاحدين
إنتى ظهورِك بَرَكَة للى عايز بَرَكات
شُفتى ولادِك مِن مُدَّة كبيرة مِتضايقين
أزمَه إقتِصادِيَّة وغَلا قال يعنى إحنا ناقصين
قُلتى أزورهُم ... وأخفِّف عَنهُم أفَرَّحهُم وِسط هُمومهُم
شَرَّفتى يا عَدرا دى زيارتِك أحلى الزِّيارات
شُفتى ولادِك مِن فَترة عايشين فى إضطهادات
حَنِّيتى لدموع إللى إتظَلَموا من الأقباط
جيتى تواسى ... جيتى تعَزِّى إللى تَعبان وإللى مقاسى
جيتى تفَرَّحى إللى فـ هَمُّه بيقُوم ويبات
وللا إنتى شُفتى حاجات أصعَب لِسَّة هَتِحصَل
ماهو إبنِك هو الله وبيشُوف المُستَقبَل
قال لِك يا بتُول ... شَجَّعى أولادى عَشان الضِّيقَة لَمَّا تطول
يفضَلوا ثابتين فى إيمانهم فى أشَد الأزَمات
على كُل الأحوال بزيارتِك فَرَّحتينا
يا أمُ النُّور يا حَبيبتى إنتى وَحَشتينا
مَصر دى بَلَدِك ... ما إنتى جيتيها وباركتيها زَمان مَع وَلَدِك
يا غاليه ماتحرِمِناش مـ البَرَكَه ومـ الشَّفاعات

المصدر: منتدى ام السمائيين و الارضيين - من قسم: موضوعات مختلفه ونادرة عن العذراء

---

(avtjn dh u]vh)